Skip Ribbon Commands
Skip to main content

Invest

Advice

Service

Invest Online Back

Call me back

Email us

Back

Call me back

Email us

Email us

Skip Navigation LinksMedia Centre

Vyf Algemene Risiko’s wat u Aftreespaarplanne kan Laat Ontspoor

10 Junie 2019

Hoewel u heel waarskynlik goed verstaan hoe belangrik dit is om vir aftrede te spaar, is u miskien nie bewus van die risiko’s wat u langs die pad kan pootjie nie. Verusha Ramlakhan, Hoof van Besigheidsoplossings by Sanlam Spaar en Geslote Boek, bespreek hierdie risiko’s en verduidelik hoe hulle u kan verhinder om u aftreespaardoelwitte te bereik as hulle nie aandag kry nie.

Versuim om te Beplan

Die grootste risiko waarmee baie mense te kampe het, is ’n gebrek aan duidelike finansiële doelwitte en ’n stelselmatige plan om hierdie doelwitte te bereik. As hierdie noodsaaklike elemente nie in plek is nie, is dit onmoontlik om te weet hoeveel u vir aftrede moet spaar. Die risiko bestaan dus dat u nie genoeg gaan spaar nie.

Die feit is dat elke finansiële besluit wat u neem, beteken dat u vir die toekoms spaar of vandag u aftreegeld bestee. Die keuses wat u nou maak, kan ’n invloed hê op die res van u lewe. Met meetbare doelwitte in plek, sal u egter weet wat om te doen as u tussen ’n luukse reis en ’n kampeervakansie moet kies, of moet besluit of u ’n nuwe motor wil koop of liewer hou wat u het. Met duidelike doelwitte om in gedagte te hou, kan u elke tree van die pad beter ingeligte besluite neem.

As u ’n plan het, sal u ook betyds weet of u u spaargeld moet aanvul. U kan byvoorbeeld een jaar se salarisverhoging wat u kry, gebruik om u aftreespaargeld ’n hupstoot te gee. U sal nog steeds dieselfde netto salaris as in die vorige jaar verdien, terwyl u u aftreebydraes opstoot – dis ’n klein opoffering wat oor die lang termyn ’n groot verskil kan maak, danksy saamgestelde rente. So nie, as u ’n 13de tjek of bonus verwag, kan u ’n deel hiervan gebruik om u aftreespaargeld aan te vul.

As u huidige aftreepolis nie sulke aanpassings toelaat nie, is daar nuwe-generasieprodukte van Sanlam beskikbaar wat u kan gebruik om u aftreespaargeld aan te vul en u doelwitte op koers te hou.

Om Langer te Leef as Verwag

Langlewendheid is een van die grootste finansiële risiko’s wat baie mense loop, en tog versuim hulle om daarvoor te beplan. Danksy gesonder leefstyle en vooruitgang van mediese wetenskap, is dit nie ongewoon om 90 jaar oud of ouer te word nie. Binne hierdie konteks is daar ’n risiko dat u u aftreespaargeld kan oorleef – veral as u groter mediese onkoste en algemene lewenskoste moet dek.

Om hierdie redes is dit belangrik om in u finansiële planne voorsiening te maak vir die moontlikheid van ’n langer lewe, hetsy deur langer te werk of u maandelikse bydraes te verhoog om meer vir aftrede te spaar.

Om u Aftreespaargeld te Vinnig oor te Dra of in Kontant om te Sit

Wanneer u van werk verander, kry u miskien die geleentheid om u aftreespaargeld na ’n ander fonds oor te dra. In hierdie geval is daar ’n risiko dat u ’n oorhaastige besluit kan neem wat op korttermynbehoeftes gegrond is, in plaas van langtermyndoelwitte.

Die versoeking kan bestaan om u aftreespaargeld alles in kontant om te sit. Dit beteken u sal van voor af vir aftrede moet begin spaar, met die risiko dat daar nie genoeg tyd oor is om die bedrag te spaar wat u nodig het om u finansiële doelwitte vir aftrede te dek nie.

Voordat u hierdie uiters belangrike besluite neem, maak eers seker of u genoeg tyd oor het om moontlike verliese wat u kan ly in te haal, en of u die aptyt het om meer aggressief te belê.

Emosionele Besluite

Wanneer die markte swak presteer of u geldsake onder druk kom, is daar ’n risiko dat u ’n emosionele besluit gaan neem om u aftreepolis te kanselleer of geld daaruit te neem. Hoewel die korttermynverligting aanloklik kan lyk, is dit belangrik om te oorweeg watter impak dit op u aftreeleefstyl kan hê.

Spaar vir aftrede is ’n langtermynbelegging. As u in moeilike tye geld uit u belegging neem, gaan u waarskynlik ’n verlies ly. As u aanhou belê, is die kanse groter dat u die skommelinge met welslae sal trotseer. Basies moet u seker maak of u finansiële besluit op emosie of logika gegrond is.

Om Oorgerus te Raak

Ten slotte is daar die risiko dat u ten opsigte van enige spaarplan oorgerus kan raak. As u vanaf ’n jong ouderdom finansiële doelwitte begin stel het en elke maand getrou spaar, is dit maklik om agteroor te sit en te glo dat u aftreeplanne op koers is. Maar die doelwitte wat u ’n paar jaar gelede gestel het, is miskien nie meer in u beste belang vir die toekoms nie.

Daarom hou dit ’n risiko in om nie u finansiële plan jaarliks in oorleg met u finansiële adviseur te hersien nie. U adviseur kan u help om seker te maak u plan groei saam met u – soos u loopbaan vorder, u leefstyl verander en u doelwitte ontwikkel. Met ’n duidelike, toepaslike en bygewerkte plan kan u al hierdie risiko’s met sorg bestuur en u finansiële toekoms beskerm.

Invest

Advice

Service

Invest Online Back

Call me back

Email us

Back

Call me back

Email us

Email us

Sanlam Life Insurance is a licensed financial service provider.
Copyright © Sanlam