Landbou Vroue Entrepreneur 2011 Finaliste

Vroue is vaardige planmakers. En die wat besighede bedryf op plase of in plattelandse  gebiede - soveel te meer!  Maar ondanks die feit dat hul aansienlik bydra tot welvaartskepping op die plaas, en ook werkgeleenthede vir omliggende gemeenskappe skep, word hul entrepreneurskap nie dikwels geprys nie. 

Sanlam, in samewerking met Landbouweekblad, vereer  jaarliks hierdie vroue vir hul  entrepreneurskap en innovasie , asook hul uitsonderlike rol in die welsyn van die plattelandse gemeenskap, deur  die Sanlam/LandbouWeekblad Landbou Vroue Entrepreneur- kompetisie 

Die ses finaliste van die  6de Landbou Vroue Entrepreneur-kompetisie is onlangs aangekondig  na 'n beoordelingsproses van die 29 inskywings wat landwyd ontvang is.

Hulle is: 

	Engela Kruger van Middelburg, Oos-Kaap se  leer-besigheid GDE Leather, verskaf bekostigbare perdetoerusting vir boere.
	Serita Swart van Victoria-Wes in die Noord Kaap se besigheid Kxoxo Leather Designs, vervaardig nie net karosse nie, maar ook 'n reeks ander artikels van plaas- en ander wilde diere.
	Ronel Swart van Graskop by Hazyview in Mpumalanga, se  sywurmboerdery Africa Silks, het reeds vyf sateliettakke.
	Annemarie Fourie van Senekal  in die  Oos- Vrystaat  se besigheid Cura Goodies is onder andere ook 'n werkskeppingsprojek wat byderwetse en uitsonderlike hekelversierings en klere vervaardig.
	Sanet Mey van Patensie in die Oos-kaap, se besigheid Miracle Comfrey het die  genesende krag  van die smeerwortelplant  ontsluit in 'n helende wondersalf.
	Hannetjie Loots van Lephalale in die Limpopo, maak  'n groot sukses deur die veelsydigheid waarmee sy haar gemeenskap dien as Brahmaan-boer, onderwyser en sielkundige.

Die wenner van die 2011 - kompetisie  sal R 65 000 se prysgeld ontvang,  terwyl  die  finaliste elk R5 000 en ander pryse ter waarde van R2 000, ontvang. 

Die wenner word op 28 Oktober tydens 'n glansgeleentheid in Durbanville, Wes-Kaap aangewys.  Die bekende radio en TV persoonlikheid, Marietta Kruger  sal as seremoniemeester optree.

Sanlam borg ook die Sanlam/Business Partners Entrepreneur van die Jaar ®. 

Klik hier vir meer  Cobalt Oplossings vir Besigheidseienaars, Sanlam se portefeulje van  finansiele oplossings vir besigheidseienaars.