Die SPI se Afdeling vir Handel in Afgeleide Aandele [Equity Derivative Trading Desk] het in Desember 2004 tot stand gekom en is in die korporatiewe kantoor in Kaapstad gesetel. SPI is 'n geregistreerde lid van die Suid-Afrikaanse Termynbeurs (SATB), wat die JSE Aandelebeurs (JSE) se afdeling vir afgeleide instrumente is.

 

Ons dienste sluit tans die volgende in:

 

• Handel in enkelaandeel-termynkontrakte

• Handel in termynkontrakte in indekse

• Gewaarborgde beleggings

• Kapitaalwaarborgstruktuur

 

Enkelaandeel-termynkontrakte

'n Enkelaandeel-termynkontrak is 'n termynkontrak waar die onderliggende sekuriteit 'n aandeel is wat op 'n beurs genoteer is. In die geval van Suid-Afrika word hierdie aandele op die JSE genoteer. Hierdie kontrak is 'n regtens bindende verpligting wat deur 'n termynbeurs aangegaan word om in die toekoms 'n enkele aandeel te koop of te verkoop. Elke enkelaandeel-termynkontrak is gestandaardiseer wat betref grootte, verstryking, en breukbeweging.

Hoe bepaal 'n mens die waarde van 'n enkelaandeel-termynkontrak? Byvoorbeeld, as Maatskappy A teen R52.00 op die SATB verhandel, is die besit van een termynkontrak in Maatskappy A gelyk aan 'n belegging van R5 200.00 in Maatskappy A se aandele, omdat 'n termynkontrak altyd gelyk is aan 100 maal die aandeel se termynprys. Die prys van 'n enkelaandeel-termynkontrak word onderhandel deur SATB se Geoutomatiseerde Handelstelsel (GHS)  -  die bestellingafstemmingsplatform ['order matching platform'].

Enkelaandeel-termynkontrakte is beskikbaar op alle likiede aandele wat op die JSE genoteer is. Enkelaandeel-termynkontraktetransaksies word deur die makelaar of makelaar-handelaar in die lokomark verskans. Die likiditeit van enkelaandeel-termynkontrakte hang dus af van die likiditeit van die onderliggende aandele.

 

Voordele van enkelaandeel-termynkontrakte

 

Handelskoste

Geen Belasting op Effekte sonder Sertifikate (BESS) is betaalbaar wanneer enkelaandeel-termynkontrakte gekoop word nie. Makelaarsloon is gewoonlik laer as in die geval van regsteekse aandele, afhangende van die grootte van die transaksie.

 

Hefboomfinansiering.

Beleggers befonds posisies teen institusionele befondsingskoerse - tipies 3% laer as die prima koers. Margetransaksies kan gebruik word om die posisie te vergroot of kontant vry te stel.

 

Daalspekulasie

Privaat kliënte kan aandele verkoop wat na hul mening oorwaardeer is, en sodoende wins maak uit 'n daling van die aandeleprys. Hierdie handelsmetode was voorheen slegs aan beleggingsbanke, verskansingsfondsbestuurders en aandelemakelaars beskikbaar.

 

Verskansing

Beleggers kan individuele aandele of 'n aandeleportefeulje teen markdalings verskans sonder om hul oorspronklike beleggings te verkoop.

 

Indekstermynkontrakte

'n Termynkontrak is 'n ooreenkoms tussen 'n koper en 'n verkoper om 'n sekere instrument teen 'n vaste prys op 'n toekomstige datum te verhandel. Indien hierdie instrumente standaardspesifikasies het en op 'n gereguleerde beurs verhandel word, word dit termynkontrakte genoem. Die enigste likiede indekstermynkontrak plaaslik is op die FTSE/JSE Top 40-indeks gegrond. Weens die besonder likiede aard van hierdie soort belegging kan groot volumes van Top 40-indekstermynkontrakte teen 'n billike prys verhandel word sonder enige beduidende impak op die mark.

 

Marge en Waardasie teenoor markprys

'n Belegger wat 'n transaksie met betrekking tot 'n termynkontrak aangaan, hoef nie ná verhandeling aankope af te sluit of die onderliggende sekuriteit ten volle te lewer nie. In plaas daarvan moet 'n bedrag van ongeveer 10% van die waarde van die handel by die SATB-verrekeningshuis gedeponeer word om verliese te dek wat as gevolg van markbewegings kan ontstaan. Dit staan bekend as marge en wissel volgens die onbestendigheid van die onderliggende instrument. Alle oop posisies sluit daagliks af om vir die markbeweging op daardie dag te verantwoord. Indien 'n posisie 'n verlies ervaar, moet bykomende marge by die verrekeningshuis gedeponeer word. Indien die posisie winsgewend is, word die geld in die belegger se rekening by sy makelaar inbetaal. Voordat handel 'n aanvang kan neem, moet die kliënt 'n aanvanklike marge wat deur die verrekeningshuis vereis word, sowel as 'n handhawingsmarge by die makelaar in afgeleide instrumente deponeer om klein nadelige bewegings te dek.

Die likiditeit en lae koste verbonde aan afgeleide aandele het 'n groot impak gehad op die manier waarop mense in die aandelemark belê. SPI Afgeleide Instrumente bied 'n volledige advies- en makelaarsdiens met betrekking tot afgeleide aandele aan SPI-kliënte. Ons ervaring en kundigheid verseker dat kliënte voordeel trek uit die beste moontlike pryse, handelsuitvoering en diens.

Vir meer besonderhede oor afgeleide instrumente en gewaarborgde beleggings, laai asseblief die brosjure af of tree in verbinding met 'n spesialis op dié gebied by spiderivatives@spi.sanlam.com .