Hou die einde van die jaar vir welwillendheid – moenie deur bankslenters gevang word nie

Hou die einde van die jaar vir welwillendheid – moenie deur bankslenters gevang word nie!

Kuberstrikroof
Strikroof (‘phishing’) is ’n slenter waar jy ’n e-pos ontvang wat lyk of dit van ’n bekende organisasie af kom, en wat sensitiewe inligting oor jouself of jou bankrekening versoek. Jy word dikwels gevra om na ’n webwerf deur te klik en sensitiewe inligting soos sleutelwoorde, kredietkaartbesonderhede of bankrekeningnommers te verskaf. Hierdie e-pos en webwerwe is natuurlik vals – en sodra jy jou besonderhede verskaf het, kan die bedrieërs dit gebruik om al jou geld te steel.

Wees VEILIG:

• As jy jou banksake aanlyn doen, tik altyd die bank se volle URL in jou soekenjin – moenie deurklik nie. En as jy klaar is, meld af.
• Banke en ander verantwoordelike finansiële instellings – insluitend Sanlam Liquid – sal nooit telefonies of per e-pos vir persoonlike inligting vra nie. Moenie op enige versoeke reageer nie – hou jou pin, sleutelwoord en ander bankbesonderhede vertroulik.
• Moenie jou banksake doen op iemand anders se rekenaar nie – internetkafees en gedeelde rekenaars kan spioenware bevat wat jou sleutelreeks afneem, en jou pinnommers, sleutelwoorde en ander besonderhede met bedrieërs deel.
• Installeer die nuutste antivirus- en antispioenware op jou rekenaar.

• Gaan gereeld jou state na!

OTM-skelmstreke
Daar is altyd ’n aantal skelmstreke aan die gang by OTM’s – waar opportunistiese misdadigers probeer om mense te beroof. Die manier om dit te verhoed is om altyd op die ergste bedag te wees – maak nie saak hoe netjies, welbesproke of vriendelik iemand is nie, as hulle by ’n OTM met jou praat, wees op die uitkyk!

Voorsorgmaatreëls:

• Moet nooit jou pin om enige rede vir enigiemand gee nie – selfs al sê hulle dat hulle bankamptenare is.
• Moenie jou kaart in die gleuf plaas voordat jy deur die OTM-skerm gevra word om dit te doen nie, en as jy die kaart moet inforseer, is iets verkeerd – moet dit nooit doen nie.
• Moet nooit ’n masjien met ’n leë skerm gebruik nie – en volg eerder die skerm se instruksies as dié van iemand wat by jou is.
• Moenie OTM’s laat in die aand gebruik nie, ook nie op plekke wat swak belig is, of waar jy enigsins onveilig voel nie – en moenie dat iemand jou aanjaag nie.
• Gebruik jou liggaam as skerm om die besonderhede wat jy intik privaat te hou.
• Moet nooit hulp van ’n vreemdeling aanvaar nie, en moet ook nie iemand anders help nie – behalwe as iemand hulp na die bank nodig het.
• Stel ’n daaglikse onttrekkingslimiet.

• Indien jou kaart deur die OTM ingesluk word, skakel self die tolvrye nommer. Moenie dat iemand anders dit vir jou doen nie – dit kan ’n slenter wees om te dink dat jou kaart gestop is.

• Terug na artikels